Ապրելակերպ

Չե՞ք կարողանում քնել

Դուք մենակ չեք այդ խնդրում։ Կատարվել են բազմաթիվ հարցումներ, թե ինչը կարող է էապես բարելավել մարդկանց կյանքը, և շատ հաճախ գիշերային լավ քունը հանդիպում է առաջին տեղում։

Վատ քունը բացասաբար է ազդում մեր մտածողության, հիշողության, ուշադրության, զգոնության վրա, նվազեցնում է մեր արդյունավետությունը օրվա ընթացքում։ Իսկ երկար անքնությունը հանգեցնում է դեպրեսիաների և տագնապայնության, նյարդային լարվածության։

մարդիկՊրոֆեսոր Ռ․ Բուդզինը` Արիզոնայից, արդեն երկար տարիներ զբաղվում է քնի տարատեսակ խանգարումների ուսումնասիրությամբ և հետազոտմամբ։ Նա մշակել է տարբեր հոգեբանական մոտեցումներ, որոնք օգնում են ազատվել անքնությունից և քնի հետ կապված այլ խնդիրներից։

Մոտեցումներից ամենապարզը կայանում է ընդամենը 5 քայլից։ Պարզապես հարկավոր է մեկ ամսվա ընթացքում հետևողականորեն կատարել այդ քայլերը և ձեր քնի որակը կբարձրանա, դուք կկարողանաք հեշտությամբ քնել և արթնանալ թարմացած ու հանգստացած։

Այսպիսով․

  1. Պառկեք քնելու այն ժամանակ, երբ կզգաք քնկոտություն։
  2. Օգտագործեք մահճակալը միայն քնելու համար։ Մահճակալի մեջ ուտել, կարդալ, հեռուստացույց դիտել, հուզվել, վախենալ և վիճել կտրականապես արգելվում է։
  3. Եթե չեք կարողանում քնել, վեր կացեք և գնացեք ուրիշ սենյակ։ Մնացեք այնտեղ այնքան, մինչև ցանկանաք քնել։ Եթե պառկել եք տաս րոպե և դեռ չեք քնել, ապա պետք է դուրս գաք սենյակից և սպասեք, մինչև կառաջանա քնելու ցանկություն։ Հիշեք, ձեր նպատակն է գիտակցության մեջ մահճակալը կապել արագ քնելու կարողության հետ։ Սկզբնական շրջանում դա կարող է լինել մի քանի անգամ գիշերվա ընթացքում։
  4. Ամեն օրվա համար զարթուցիչը միացրեք միևնույն ժամին։ Զարթուցիչի միանալու հետ միասին անպայման վեր կացեք, անկախ նրանից, թե ինչպես եք քնել գիշերը։ Դա կօգնի օրգանիզմին համապատասխանեցնել քնի ռեժիմը։
  5. Մի քնեք օրվա ընթացքում։

Ինչու՞ է այս ամենը աշխատում։

Պրոֆեսոր Բուդզինի առաջարկած մոտեցումը հիմնված է պավլովյան պայմանական ռեֆլեքսների ձևավորման տեսության վրա։ Դա ամենահեշտ և ամենաարդյունավետ միջոցն է ցանկացած նոր վարքի, սովորության ձևավորման համար։

Այս դեպքում Ձեր խնդիրն է սովորեցնել օրգանիզմին և գիտակցությանը ընդունել մահճակալն որպես ազդակ միանգամից քնելու։

Հաճելի երազներ Ձեզ։

Հեղինակի մասին

Մարիամ Պետրոսյան

Մարիամ Պետրոսյան

Ավարտել է ԵՊՀ Փիլիսոփայության և հոգեբանության ֆակուլտետի մագիստրատուրան: Պարբերաբար անցկացնում է սեմինարներ և թրեյնինգներ՝ ձգտելով նպաստել երեխաների և մեծահասակների ստեղծագործ մտքի զարգացմանը։ Սիրում է հավաքել փայտե մակետներ, զբաղվել ձեռագործությամբ: