1969 թվականին ԱՄՆ-ում լույս տեսավ Իտալական ծագմամբ ամերիկացի գրող Մարիո Պյուզոյի «Կնքահայրը» վեպը,
որն իր ժամանակ պիտի արժանանար աննախադեպ ընդունելության ու ավելի մեծ հռչակ պիտի բերեր հեղինակին։
Վեպը ցայսօր էլ համաշխարհային գրականության ասպարեզում համարվում է ընթերցման մեծ պահանջարկ ունեցող գրքերից մեկը և ի թիվս բազմաթիվ այլ լեզուների, այն թարգմանվել է նաև հայերեն։
3 տարի անց, Հոլիվուդյան Փարամաունթ Փիքչերզ կինոընկերությունը՝ ի դեմս տաղանդավոր, դարձյալ ծագումով իտալացի կինոռեժիսոր Ֆրենսիս Ֆորդ Կոպոլայի, հանդիսատեսի դատին է հանձնում համանուն՝ «Կնքահայրը» ֆիլմը՝ ժամանակի հայտնի կինոլեգենդների (Մարլոն Բրանդո և այլն) և երիտասարդ տաղանդավոր այլ դերասանների մասնակցությամբ (Ալ Պաչինո, Տալիա Շայր և այլն)։
Ինչպես և գիրքը՝ ֆիլմը ևս արժանացավ բուռն ընդունելության և իր տեղը գտավ համաշխարհային կինոյի լավագույն գլուխգործոցների, ասել է թե՝ դասականների շարքում։ Ֆիլմը հետագայում՝ 1974, ապա նաև 1990 թթ․ վերածվեց եռերգության։ 1990 թվականին լույս տեսած՝ «Կնքահոր ընտանիքը․ հայացք ներսից» դոկումենտալ ֆիլմը բացահայտում է հետաքրքիր դրվագներ՝ այդ ժամանակ դեռ նկարահանման փուլում գտնվող «Կնքահայրը-3» ֆիլմի նկարահանման հրապարակից։
Ֆիմում նկարահանվել են այս եռերգության ռեժիսոր Ֆրենսիս Ֆորդ Կոպոլան, «Կնքահայրը» բեսթսելլերի հեղինակ Մարիո Պյուզոն, ստեղծագործական կազմի անդամները և եռերգության հերոսներին մարմնավորած բոլոր անվանի դերասանները, ովքեր կիսվում են իրենց հետաքրքրաշարժ պատմություններով․․․ Հետաքրքիր է, չէ՞․․․
Բարի՛ դիտում։
