«ԱՐԱՐ» հայ արվեստի պահպանման և հանրահռչակման ծրագրի նպատակն է Հայաստանի մարզերում մշակութային ոլորտների պահպանումը, տարածումը: Գոհար Մարալչյանը, ով մասնագիտությամբ գծագրող – նկարիչ է: Բերդավանում երեխաներին դասավանդում է կերպարվեստ, նշեց, որ. «Ծրագիրն իրականացվում է ՀՀ ԿԳՄՍ նախարարության կողմից: Ծրագրի գաղափարի կրողները և հիմնադիրներն են մշակույթի նախկին նախարար Արմեն Ամիրյանը և ՀՀ վաստակավոր արտիստ Արսեն Գրիգորյանը»: Իրականացվում է Հայաստանի մի շարք մարզերում, 2017 թվականի օգոստոսի 20-ից՝ նաև Տավուշի մարզի սահմանամերձ Բերդավան գյուղում:
Բերդավանում իրականացվող այս ծրագրի մասին ավելի ամբողջական տեղեկություններ ստանալու նպատակով զրուցեցինք Գոհար Մարալչյանի հետ: Yerevanstyle.com-ի հետ զրույցում նա նշեց, որ այս պահին ունեն 3-18 տարեկան 80 աշակերտ, ովքեր հաճախում և սովորում են «ԱՐԱՐ» ծրագրում: Այստեղ գործում են կերպարվեստի, փայտի փորագրության, խաչքարագործության, ազգային երգ ու պարի խմբակներ: Բոլոր երեխաները Բերդավանից են, սակայն, եթե ցանկացողներ լինում են, ընդգրկում են նաև հարակից գյուղերի երեխաներին: Մինչ այժմ իրականացրել են ցուցահանդեսներ Բերդավանում և Նոյեմբերյան քաղաքում:
Խոսելով խնդիրների և դժվարությունների մասին՝ նա նշեց. ‹‹Դասասենյակը գտնվում է Բերդավանի մշակույթի տանը, և ընդհանուր շենքի ջեռուցմումը լուրջ խնդիր է ներկայացնում հատկապես ձմռան ամիսներին: Էլեկտրական տաքացուցիչներ ենք միացնում, բայց դա բավարար չէ: Եղել են օրեր, երբ երեխաներին տուն ենք ուղարկել»:
«Ցանկություն ունենք ապրիլին մասնակցել «Էտյուդ» մրցույթին, ուղղակի դեռ մի քանի տեխնիկական հարցեր ունեք հստակեցնելու: Հատկապես գյուղում՝ սահմանին ապրող երեխաներին, միայն մրցույթի և հաղթանակ տանելու մտքերը չէ, որ ոգեշնչում են. Երևան գնալու գաղափարն իսկ նրանց աչքերում յուրահատուկ փայլ է առաջացնում,-ուրախությամբ նշում է Գոհար Մարալչյանը և, խոսելով ապագա պլանների մասին՝ ավելացնում է. ‹‹ Իմ բոլոր մտքերը արվեստի հետ են կապված, այս պահին մտորում եմ արվեստ- բիզնես համագործակցության ծրագրի շուրջ, այն է՝ երեխաների հետ համատեղ ստեղծել և զարգացնել տիկնիկագործություն, որը հետագայում, կդառնա տիկնիկային թատրոն: Մտածում եմ նաև տիկնիկներ պատրաստելու և վաճառելու մասին, ինչի արդյունքում կունենանք վերաֆինանսավորում և ստացած գումարը կծառայացնենք նոր գաղափարների իրագործմանը: Ցավոք այս պահին չունենք հովանավորներ գաղափարս կյանքի կոչելու համար»:
Հստակ տոնով ավելացնում է. ‹‹Սահմանին ապրող երեխաների և երիտասարդների համար չափազանց կարևոր եմ համարում այսպիսի ծրագրերը, քանի որ սա նոր հնարավորություններ է բացում երեխաների առջև ինքնադրսևորվելու, զարգանալու համար, կտրվելու առօրյայից. միօրինակությունը, ինչքան էլ լավը լինի, ամեն դեպքում երեխաներին ձանձրացնում է»:
Մեկնաբանել գրառումը