Ինչպես պարզվեց, «Այո»-ի լոգոյի մրցույթին մասնակցած և հաղթած կազմակերպությունն ամենևին էլ ժամանակ չէր ծախսել նոր բան մտածելու վրա, այլ որոշել էր թարմացնել բոլորիս հիշողությունը՝ ներկայացնելով 29 տարի վաղեմության դիզայնը:
«Այո»-ի լոգոյի հեղինակը Ստյոպա Նարոյանն է: Այս մասին Tert.am-ի հետ զրույցում ասաց նկարիչ Ցոլակ Ղանդիլյանը՝ անդրադառնալով Սահմանադրական փոփոխությունների «Այո»-ի քարոզարշավի լոգոյին, որը նման է 1991թ. Անկախության հանրաքվեի ժամանակ հրապարակված արդեն հայտնի լոգոյին: Այն զետեղված է եղել «Երեկոյան Երևան» օրաթերթի սեպտեմբերի 23-ի համարում:
Այս ամբողջ խառնաշփոթից հետո ոչինչ չէր մնում անել, քան այն, որ Քաղաքացիական պայմանագիր կուսակցության անդամ Վահագն Ալեքսանյանը «Ֆեյսբուքի» իր էջում գրառում է կատարել և նշել է, որ «Այո»-ի բրենդինգի մրցույթի համար հատկացված գումարը կբաշխվի երեք մարդու միջև:
«Դե ինչ, ընկերներ, «Այո»-ի բրենդինգի մրցույթի առաջին հորիզոնականի համար նախատեսված 3 միլիոն դրամ գումարը կբաշխվի «Երեկոյան Երևան» թերթի 1991 թ․-ի խմբագիր Նիկոլայ Ենգիբարյանին, գծանկարիչներ Ցոլակ Կանթեղ Ղանդիլյանին և Նարոյան Ստեփանի իրավահաջորդին։ Յուրաքանչյուրին՝ 1 միլիոն ՀՀ դրամ։
Սա ֆանտաստիկ պատմություն էր՝ ֆանտաստիկ սիմվոլիկայով»։
Լուռ չի մնացել նաև բրենդինգի մրցույթը շահած Garoon գործակալության ֆեյսբուքյան էջը՝ պարզաբանում տարածելով՝ կապված 1991 թ. անկախության հանրաքվեի տարբերանշանի կրկնության հետ:
«Հարգելի հայրենակիցներ, ստորև պարզաբանում եմ ստեղծված իրավիճակը։ Հանդիսանալով մարքեթինգային կազմակերպություն, և ծանոթ լինելով հեղինակային իրավունքի խախտման մասին օրենքներին, ինչպես նաև տիրապետելով դիզայնի, առաջխաղացման և գովազդի բոլոր մանրամասներին, պաշտոնապես հայտարարում ենք, որ մենք, իհարկե, տեղյակ ենք եղել պաստառի գոյությանը։
Պարզաբանում ենք, որ 1991 թվականի «Երեկոյան Երևան» թերթում տեղ գտած նկարազարդման/poster գաղափարը հանդիսացել է ոգեշնչման աղբյուր։ Այն իր մեջ ամփոփում է շղթաներից ազատման կոչի, և, իհարկե, «Այո՛»-ի ոգին։ «Գարուն»- ը տեղին է համարել օգտագործել պաստառի տառատեսակը, և մշակելով այն, վերածել է «Այո՛» արշավի լոգոտիպի։
Նշեմ, որ ՀՀ օրենսդրությունը հստակ տարբերակում է պաստառի և լոգոտիպի սահմանումը, ինչպես նաև հեղինակային իրավունքի խախտման կարգը։ «Գարուն»- ը որևէ մեկի հեղինակային իրավունքը չի՛ խախտել։
Հարգելով Նիկոլայ Ենգիբարյանի, Ցոլակ Կանթեղ Ղարիբյանի, Ստեփան Նորոյանի աշխատանքը՝ մենք միանում ենք «Այո՛» շտաբի որոշմանը։ «Գարուն» գործակալության ստեղծած և մշակած լոգոտիպը կշարունակի մնալ «Այո՛» արշավի խորհրդանիշը, և մեր գաղափարը կծառայի իր նպատակին։
Շնորհակալ ենք բոլորին՝ արտահայտած հետաքրքրության, կարծիքների և սատարման համար։»,- նշվում է պարզաբանման մեջ:
Discussion about this post