Կորոնավիրուսը շարունակում է գրոհել ու գրոհել՝ ստիպելով բոլորին հաշվի նստել իր հետ: Թերևս գաղտնիք չէ, որ կորոնավիրուսի պատճառով չեղարկվում են օրական տասնյակ թռիչքներ, ամբողջ աշխարհի մակարդակով տուրիստական լուրջ հետընթաց է տեղի ունենում, տնտեսությունը շատ երկրներում կանգնած է, որոշ գործարաններ՝ փակված: ԱՀԿ-ն արդեն կորոնավիրուսը որակել է համաճարակ:
YerevanStyle.com-ը ներկայացնում է մի քանի ուշագրավ իրադարձություններ և պարտադրված որոշումներ համաշխարհային տնտեսական, սպորտային և մշակութային անցուդարձից:
Թերևս մեզ առավել անհանգստացնողն իշխանական լրահոսից այն տեղեկությունն է, որ Հայաստանում մարտի 11-ին հայտնաբերվեց ևս 3 կորոնավիրուսով վարակված անձ: Բոլորը Հայաստան ժամանել են Իտալիայից: Նրանցից 1-ը Իտալիայի (տարիքը` 51), իսկ 2-ը Հայաստանի քաղաքացիներ են (տարիքը` 45 և 27):
Google ընկերությունը COVID-19 կորոնավիրուսի տարածման հետ կապված իր աշխատակիցներին կոչ է արել մնալ տանը մինչեւ ապրիլի 10-ը: Երկուշաբթի ընկերությունն արգելել է Նյու Յորքի եւ Սան Ֆրանցիսկոյի իր մի քանի գրասենյակներ այցելուների մուտքը:
Apple ընկերությունը չեղարկել է նոր iPhone-ի շնորհանդեսը: ABN-ի հաղորդմամբ՝ ընկերության շտաբ բնակարանը, որը գտնվում է Կալիֆոռնիայի Սանտա Կլարա շրջանում, արգելել է զանգվածային միջոցառումները մարտի 11-ից ապրիլի 1-ը: Այդպիսով, չեղարկվել է նոր iPhone-ի շնորհանդեսը, որը պետք է տեղի ունենար մարտի վերջին: Նշենք, որ ընկերությունը մտադիր էր ներկայացնել նոր iPad Pro-ն, iPhone 9-ը եւ այլ սարքեր:
Կորոնավիրուսի պատճառով Գերմանիայի մայրաքաղաքում մինչև ապրիլի 19-ը չեղյալ են հայտարարվել ավելի քան 1000 մարդու մասնակցությամբ զանգվածային բոլոր միջոցառումները: «Կորոնավիրուսը տարածվում է: Այս փուլում հանրային կյանքը պետք է սահմանափակվի», – ասել է սենատորը, որի հայտարարությունը հրապարակվել է Բեռլինի Սենատի կայքում:
Նյու Յորքում նախատեսված «Բիզնեսի իրականացումը կորոնավիրուսի ազդեցության ներքո» խորագրով համաժողովը Արտաքին հարաբերությունների խորհուրդը չեղարկել է կորոնավիրուսի տարածման պատճառով: «Արմենպրես»–ի հաղորդմամբ, «Bloomberg»-ը տեղեկացնում է, որ խորհուրդը չեղարկել է նաև այլ համաժողովներ ևս, որոնք նախատեսված են եղել մարտի 11-ից ապրիլի 3-ն ընկած ժամանակահատվածում, ներառյալ Վաշինգտոնում և Նյու Յորքում կայանալիք կլոր սեղանները, ազգային միջոցառումները՝ ԱՄՆ-ի տարածքում:
Գեղասահքի աշխարհի առաջնությունը, որ պիտի կայանար Կանադայում՝ Մոնրեալում, նույնպես չեղարկվել է: Աշխարհի առաջնությունը նախատեսված էր անցկացնել մարտի 18-22-ը: Առայժմ նոր ամսաթիվ չի նշանակվել, սակայն չի բացառվում, որ մրցաշարը տեղափոխվի աշուն:
Ավելի վաղ Կանադայում չեղարկվել էր նաև կանանց հոկեյի աշխարհի առաջնությունը, որը պետք է անցկացվեր մարտի 31-ից ապրիլի 10-ը:
Իսպանիայի Գավաթի եզրափակչի՝ «Աթլետիկ»-«Ռեալ Սոսյեդադ» հանդիպումը, որ պիտի կայանար ապրիլի 18-ին, հետաձգվել է: Այս մասին հայտնում է իսպանական Արքայական ֆուտբոլի ֆեդերացիայի պաշտոնական կայքը (RFEF):
Ֆուտբոլի Եվրոպայի լիգայի 1/8 եզրափակչի շրջանակներում «Ռոմա»-ն պետք է մրցեր «Սևիլիա»-ի հետ, սակայն Իսպանիան փակել է օդային հաղորդակցությունն Իտալիայի հետ: «Գայլերը» չեն մեկնել մրցավայր:
Ջեյմս Բոնդի մասին պատմող «Մեռնելու ժամանակը չէ» ֆիլմի պրեմիերան հետաձգվել է կորոնավիրուսի համաճարակի պատճառով: Ֆիլմի պրեմիերան նախատեսվում էր ապրիլին:
Այց ցանկը կարելի է երկար շարունակել՝ Եվրոպայի խորհրդի Ստրասբուրգյան նստաշրջան, ծանրամարտի երիտասարդական ու պատանեկան աշխարհի առաջնությունները, Սանկտ Պետերբուրգի տնտեսական ֆորումը,
Չեղարկման իրական վտանգի տակ են նաև այնպիսի մեծ և մասսայական միջոցառումներ, ինչպիսիք են ամառային օլիմպիական խաղերը, Ֆուտբոլի Եվրոպայի առաջնությունը, Եվրատեսիլ երգի մրցույթը, Ա Սերիայի, Լա Լիգայի և Սեգունդայի բոլոր խաղերը…
Discussion about this post