Փաստաբան Լիանա Էնլին սկսել է ստեղծագործել 18 տարեկանից: Անկախ այն հանգամանքից, որ փաստաբանի աշխատանքը իրենից ներկայացնում է խիստ պաշտոնական, ճշգրիտ թվագրված աշխատանք, այնուամենայնիվ նա դեռ ուսանողական տարիքից շատ է սիրել տարբեր ժանրերի ֆիլմեր դիտել և հաճախ իրեն պատկերացրել է, սցենարիստի դերում, ստեղծագործական ազատություն տալով իրեն: Ինչն էլ տարիների հետ հիմք է հանդիսացել «Եթե դու լինեիր այստեղ» գրքի հրատարակման, որի շնորհանդեսը կայացավ մարտի 7-ին:
Փաստաբանից մինչև ստեղծագործող անձի բացահայտման նպատակով YerevanStyle.com-ը որոշեց զրուցել նրա հետ:
Այս պատմությունը գրելու նախահիմքը ի՞նչը հանդիսացավ, Լիանա Էնլին նշեց. «Միտքը ծնվել է նախանցած տարի, երբ ես արտերկրում էի: Հարազատներից, ընկերներից, հեռու գտնվելու մտքերը, կարոտը, այն ամենը ինչ կատարվում էր իմ ընկերների հետ, պատճառ հանդիսացան գրելու: Քանի որ հնարավորություն ունեի կողքից ուսումասիրելու: Առաջին միտքը, որ եկավ վերնագիրն էր, քանի որ ինձ շրջապատող մարդկանց մեջ կար ինչ- որ բացեր, վախեր, տարբեր իրավիճակների վերաբերյալ: Փորձեցի լուծումը տալ, ինչ -որ անձի միջոցով: Քանի որ, եթե այդ անձը լիներ նրանց կողքին այդ վախերը այլևս չէին լինի: Գրքում պատմվում է ներանձնային հարաբերությունների մասին, իր մեջ ներառելով տարբեր մարդկանց կյանքից վերցված իրողություններ: Գեղարվեստական ոճով ամփոփել եմ մեկ կերպարի մեջ:
«Ինձ միշտ հետաքրքրել է հոգեբանությունը: Հնարավորության դեպքում մասնակցել եմ տարբեր դասընթացների: Ձեռք եմ բերել վկայականներ: Միգուցե հենց այդ մասնագիտության ուսումնասիրությունը նաև պատճառ հանդիսացավ գրելու այս գիրքը: Քանի որ, ինքս ինձ հիշելու օրվանից ի վեր, սիրել եմ շփվել, ծանոթանալ մարդկանց հետ: Կյանքի տարբեր իրավիճակներում նախընտրում եմ լռել, դիմացինի վարքագիծը հասկանալու համար: Լսում եմ լռությունը և հասկանում, թե ինչքան շատ բան է ասում մեզ այն»,- նշեց նա:
Ի՞նչ կփոխի ընթերցողի կյանքում Լիանա Էնլին նշեց. «Ինքս ինձ համար կարող եմ նշել, որ որոշակի վախեր զիջեցին: Կյանքի շատ իրավիճակներին վերլուծության հնարավորություն տալով: Ուզում եմ նաև նշել, որ սա իմ առաջին աշխատությունն էր, և համոզված եմ շատերը կհասկանան, երբ մի բան առաջի անգամ ես անում, նաև կասկածներ են առաջանում, կհավանեն, չեն հավանի: Հույս ունեմ 16-35 տարիքային խմբի անձանց համար, ովքեր որոնման մեջ են բոլոր առումներով, որոշակի դրվագներ իրենց հոգեհարազատ կհամարեն: Դատողություններ կանեն իրենք իրենց համար, կոնկրետ իրավիճակում, և կնկատեն, թե կյանքում, ինչ մանրուքներ կան»:
Ցանկացողները որտեղի՞ց կարող են ձեռքբերել գիրքը. «Գիրքը նաև օնլայն է վաճառվում, ցանկացողները կարող են գրել հատուկ այդ նպատակով բացված «Լիանա Էնլի» էջին, և կկազմակերպենք փոխանցումը: Կա նաև «Նոյյան Տապան», «Բուկինիստ» և այլ գրախանութներում»,- նշեց նա:
Խոսելով ապագա պլանների մասին, Լիանան ժպիտով ասաց. «Ովքեր կարդացել են այս գիրքը, ասում են, որ կարելի է ֆիլմ նկարահանել: Ինքս էլ գրելու ընթացքում այդպես եմ պատկերացրել: Սակայն հասկանում եմ, որ ներկա պայմաններում, նման հնարավորությունը գրեթե բացակայում է»: ՙՈգևորությամբ շարունակելով միտքը ասաց. «Պատրաստվում եմ մայիս ամսին անգլերեն թարգմանել՝ դարձնելով ավելի միջազգային բնույթի: Նպատակ ունեմ մեկ այլ գիրք հրատարակելու, քանի որ միտքը վաղուց կար, որտեղ պատմվում է գերբնական, բայց իրական ուժերի ու երևույթերի մասին: Սակայն մտածեցի, որպես փորձնական առաջին մուտք, ընթերցողին ավելի ճիշտ կլինի ներկայանալ այս պատմությամբ:
Ամփոփելով խոսքը, կառանձնացնեիք արդյո՞ք, ինչ-որ կարգախոս ինքներդ ձեր և ընթերցողի համար, Լիանա Էնլին նշեց. «Ընթերցողը արդեն ինքը իր համար կգտնի հարազատ և մոտիվացնող հատվածը, բայց այնուամենայնիվ կառանձնացնեմ մեկ միտք: Լինում են պահեր, որ քեզ թվում է, թե մոլորված, կտրված ես աշխարհից, և վախերդ այնքան լսելի են, որ շրջապատից եկող որևէ բան չես հասկանում: Խորհուրդ կտամ, որ մի պահ կանգ առնեն և լռությանը մոտ կանգնեն, այդ ժամանակ, այն ինչ իրենց իսկապես պետք է կլսվի»:
Discussion about this post