Հայաստան Նորություններ, մամուլ

Կորոնավիրուսի պատճառով ԱՄՆ-ում հայտարարվել է արտակարգ դրություն

YEREVANSTYLE
Հեղինակ՝ YEREVANSTYLE

ԱՄՆ նախագահ Դոնալդ Թրամփը հայտարարել է երկրի ողջ տարածքում արտակարգ դրություն հայտարարելու մասին։ Պատճառը կորոնավիրուսի տարածումն է ԱՄՆ-ում և աշխարհի երկրների մեծ մասում։ Ամերիկյան առաջնորդն այդպիսի հայտարարությամբ հանդես է եկել ուրբաթ օրը՝ Սպիտակ տանը հրավիրված արտահերթ մամլո ասուլիսի ժամանակ։

«Այսօր ես պաշտոնապես հայտարարում եմ արտակարգ դրություն հայտարարելու մասին»,- հայտնել է Թրամփը։

Այն հնարավորություն կտա վերացնել բոլոր այն բյուրոկրատական խոչընդոտները, որոնք խանգարում են դաշնային իշխանություններին բյուջեից գումարներ հատկացնել տեղական իշխանություններին և նահանգների վարչակազմերին։ Ավելի վաղ ամերիկյան վարչակազմը Կոնգրեսից ստացել էր 8,3 միլիարդ դոլար՝ վիրուսի տարածման մասշտաբների կանխման համար։ Նախատեսվում է ԱՄՆ արտակարգ իրավիճակների կառավարման դաշնային գործակալությանը, Աղետների օգնության ֆոնդից, տրամադրել 50 միլիարդ դոլար, որը կծառայի կորոնավիրուսի դեմ պայքարին։

Մինչ արտակարգ դրության հայտարարումը Սպիտակ տանը տեղի էր ունեցել արտակարգ խորհրդակցություն։ Ընդ որում, լրատվամիջոցները հայտնել էին, որ արտակարգ խորհրդակցությունը տեղի է ունեցել այն բանից հետո, երբ տարածվել էր Բրազիլիայի նախագահ Ժաիր Բոլսոնարուի մոտ կորոնավիրուսի ստուգման թեստի դրական պատասխանի լուրը, որը սակայն, ավելի ուշ, հերքել էր հենց ինքը՝ Բրազիլիայի նախագահը։ Հետաքրքականն այն է, որ մի քանի օր առաջ տեղի էր ունեցել Թրամփ-Բոլսոնարու հանդիպումը, ինչը կասկածներ էր առաջացրել նաև Թրամփի հնարավոր վարակման վերաբերյալ։ Հանդիպումից հետո Թրամփը հրաժարվել էր հանձնել անալիզներ։

ԱՄՆ-ում արտակարգ դրություն հայտարարելու իրավունքը պատկանում է նախագահին։ Մինչև 1976 թվականը երկրի ղեկավարը արտակարգ դրություն կարող էր հայտարարել ցանկացած ժամկետով և ցանկացած պարագայում, որն, ըստ նրա, կարող էր սպառնալ ամերիկյան ազգային անվտանգությանը։ Ավելի ուշ, այն կարգավորվել է «Ազգային արտակարգ իրավիճակների մասին» ամերիկյան օրենքում (National Emergencies Act; 1976)։ ԱՄՆ պատմության ողջ ընթացքում արտակարգ դրություն է հայտարարվել շուրջ 50 անգամ։

Վերջին տվյալներով ԱՄՆ-ում կորոնավիրուսի վարակակիր է շուրջ 1700 մարդ, 40-ը մահացել են։

Հեղինակի մասին

YEREVANSTYLE

YEREVANSTYLE

YerevanStyle.com-ը նորաստեղծ երիտասարդական ինֆորմացիոն-ժամանցային կայք է, որի նպատակն է մատուցել հետաքրքիր նյութեր և նորություններ, որոնք դրական ազդեցություն կունենան հայ հասարակության վրա և կտան նորանոր մտքեր:

Մեկնաբանել գրառումը