Համացանցի համաշխարհային օր

Մեր կյանքը պատկերացնել առանց համացանցի, համաձայնեք, խենթություն կլինի: Այսօր համացանցը ներխուժել է մեր կյանք հնարավոր բոլոր կողմերից՝ դառնալով մեր առօրյայի ընկերը:

Համացանցը վաղուց արդեն ոչ միայն ինֆորմացիայի, տեղեկություն ստանալու աղբյուր է, այլ շփման, զվարճանքի, առևտրի ու վաճառքի լավագույն տարբերակներից մեկը: Շնորհիվ համացանցի՝ կարելի է մի քանի վայրկյանում հայտնվել երկրագնդի ցանկացած վայրում, գնել ցանկացած իր, դիտել ցանկացած ֆիլմ, հյուր գնալ, միմյանց տեսնել, լսել, մասնակցել կոնֆերանսի և այլն:

Այսօր՝ ապրիլի 4-ին, ամբողջ աշխարհում նշվում է Համացանցի համաշխարհային օրը (թեև տարվա ընթացքում նմանատիպ օրեր նշվում են մի քանի անգամ՝ նաև մայիսի 17-ը, սեպտեմբերի 30-ը ):

Համացանցի ստեղծման տարեթիվ ընդունված է համարել 1969 թվականը, երբ ԱՄՆ պաշտպանության նախարարության հիմնարկությունների մեծ մասը միավորեցին իրենց համակարգչային ցանցերը մեկ միասնական ցանցի՝ ARPANET-ի (Advanced Research Projects Agency Network) մեջ, որը համարվում է համացանցի նախատիպը։

Սկբնական շրջանում ցանցը միացնում էին այն ստեղծող չորս գիտական հաստատությունները, բայց շուտով ցանցն սկսեց ակտիվորեն աճել: 1971թ.-ին մշակվեց էլեկտրոնային փոստի առաջին ծրագիրը, 1973թ-ին ցանցին միացան առաջին օտարերկրյա կազմակերպությունները`   Մեծ Բրիտանիան և Նորվեգիան, այդպիսով ցանցը դարձավ միջազգային:

1983թ.-ին ARPANET-ն սկսեց TCP/IP հաղորդակարգի օգտագործումը, որը կիրառվում է մինչև օրս:

Այսօր համացանցը հասանելի է գրեթե ամենուր: Որքան էլ տարօրինակ է, համացանցը հասանելի է նույնիսկ աշխարհի ամենաբարձր լեռան՝ Էվերեստի վրա: Ncell ընկերությունը ծախսել է 100 մլն դոլար, որպեսզի տեղակայի անհրաժեշտ սարքավորումները հենց լեռան գագաթին: Այդ շրջանի բնակիչները նույնպես կարող են ցանկացած ժամանակ օգտվել համացանցից:

Մի հետաքրքիր դիտարկում ևս՝ այն տեղեկատվությունը, որ ամեն օր մարդն ստանում է համացանցից, մարտահրավեր է նետում այդ տեղեկատվությունը յուրացնելու մարդու ուղեղի ընդունակությանը:

Օրինակ՝ սովորական լրատվական կայքը պարունակում է ավելի շատ տեղեկատվություն, քան կարող էր ստանալ 18-րդ դարի մարդը ողջ կյանքի ընթացքում: