Կորոնավիրուսի հետևանքով ստեղծված իրավիճակը բնապահպանության տեսանկյունից վերլուծելու նպատակով՝ թե մարդկանց ինքնամեկուսացումն ինչպիսի ազդեցություն է թողել ընդհանուր երկիր մոլորակի և բնաշխարի վրա, YerevanStyle.com-ը հեռահար տարբերակով զրուցեց բնապահպան-կենսաբան Մերի Ամիրզյանի հետ:
–Որպես բնապահպան, ինչպե՞ս կգնահատեք՝ անցյալում ի՞նչ վիճակում էր գտնվում ընդհանուր բնաշխարհը:
– Ոչ ոքի համար գաղտնիք չի, որ մարդը երկրի վրա հայտնվելու իր առաջին պահից սկսել է օգտագործել բնության բարիքները, օգտվել բնական ռեսուրսներից՝ հանուն իր շահի և առօրյայի: Վերջին շրջանում մարդկանց քանակի ավելացման և պահանջմունքների բավարարման համար ավելի շատ են օգտագործվել բնական ռեսուրսները, հատվել անտառները, կառուցվել արտադրամասեր, քիմիական գործարաններ, որոնք անգնահատելի վնաս են հասցրել բնությանը, մեր մոլորակին: Մոտ 8 մլրդ. մարդկանց կերակրելու պատճառով բնությունից սկսեցին վերանալ կենդանիների և բույսերի հազարավոր տեսակներ, հատվել են հեկտարներով անտառներ, և որն էլ նպաստել է ջերմաստիճանի բարձրացմանը, անապատացմանը:
– Հիմնականում աղտոտվածության բարձր մակարդակ էր նկատվում, ըստ ձեզ, ո՞րն էր պատճառը:
– Օդի աղտոտվածությունը գլխավոր էկոլոգիական հիմնախնդիրն է համարվում: Խոշոր քաղաքներում, մեգապոլիսներում՝ Նյու Յորքում, Տոկիոյում, Լոնդոնում, մեծ է օդի աղտոտվածության մակարդակը, որի պատճառը տրանսպորտն է և տրանսպորտից արտանետվող վնասակար տարրերը, հիմնականում ածխածնի երկօքսիդը: Իսկ մյուս երկրներում նկատվում է թափոններով աղտոտում, որոնք ահռելի քանակությամբ նետվում են գետերի, օվկիանոսների մեջ:
-Իսկ սղտոտումը իրականացվում էր միայն մարդկային գործոնի միջոցով, թե՞ այլ գործոններ ևս նկատվում էին.
-Աղտոտման գլխավոր մեղավորը, իհարկե, մարդն էր: Կարծում եմ՝ ոչ ոք իր բնակարանում աղբը թողնել չի ցանկանա, բայց բնության մեջ, փողոցում կամ գետերում թողնում էին: Բնությունը աղտոտումից ինքնամաքրվելու հատկություն ունի, սակայն մարդիկ չէին թողնում բնությանը հանգիստ, և օրեցօր ավելի էր շատանում աղտոտումը:
– Որպես բնապահպան, ինչպե՞ս կգնահատեք ներկայիս իրավիճակը:
– Այսօր, չնայած մարդիկ քաոսի և հարկադրված ինքնամեկուսացման մեջ են, և չեն կարողանում դուրս գալ տնից և ապրել լիարժեք կյանքով, դադարեցված են որոշ ավիաթռիչքներ, փակ են մի շարք գործարաններ և այլն, սակայն ուրախությամբ կարող եմ ասել, որ բնությունը հանգստանում է մարդկանցից, և առաջին դրական տեղաշարժերն ակնհայտ են:
– Կորոնավիրուսի հետևանքով մարդկանց ինքնամեկուսացումը, ինչպիսի՞ ազդեցություն է ունեցել օդի և ընդհանրապես բնության վրա:
– Մարդկանց ինքնամեկուսացումը նպաստել է մթնոլորտի մաքրմանը, և ըստ NASA-յի, տիեզերքից արված նկարներում արդեն նկատելի են մեծ քաղաքներում CO2-ի կտրուկ նվազման պատկերներ: Քանի որ տրանսպորտի քանակը նվազել է, իջել է նաև աղմուկի քանակը, որը ևս պակաս վնաս չէր հասցնում մարդկությանը: Մաքրվել են ջրանցքներ, գետեր, լճեր: Որոշ հատվածներում կենդանիները նույնիսկ օգտվելով մարդկանց տնից դուրս չգալու փաստից, հայտնվել են բնակավայրերում: Սա անչափ հաճելի է:
– Բնության ինքնամաքրման ներկայիս գործընթացն ի՞նչ դրական հետևանքներ և արդյունքներ կարող է ստեղծել ապագայի համար:
– Առաջին հերթին հաճելի պետք է լինի բոլորի համար մաքուր միջավայրում ապրելը, և այսօր, երբ արդեն ունենք քիչ թե շատ մաքուր միջավայր, պետք է կարողանանք պահել այն: Դրական հետևանքները շատ են. առաջին հերթին հենց բնության համար, քանի որ երկար տարիների ընթացքում բնությունը կարողացավ վերջապես ինքնամաքրվել, և իհարկե նաև մեզ համար՝ լինելու ավելի առողջ, և ապրելու մաքուր միջավայրում:
– Նայելով ապագային, ինպիսի՞ն կլինենք մենք բոլորս, ինչպես նաև բնությունը այս համաճարակային իրավիճակի հաղթահարումից հետո, ամփոփելով խոսքը Մերի Ամիրզյանը նշեց. «Այս օրերը շատերի համար սթրեսային է, բայց ամեն ինչ միշտ լավ է ավարտվում: Միշտ պետք է հիշել, որ մենք բնության մի մասնիկն ենք, և պարտավոր ենք հոգ տանել մեր շրջակա միջավայրի մասին: Շատ եմ ցանկանում, որ այս իրավիճակի հաղթահարումից հետո բոլորս ապրենք բնության հետ ներդաշնակ, առանց վնասելու բնությանը, այդ դեպքում մենք բոլորս կլինենք առողջ, իսկ միջավայրը՝ մաքուր»:
Discussion about this post