Նոր իրավիճակ, նոր հնարավորություններ. Անվճար դասընթացներ գրաֆիկ-դիզայնի ոլորտում

Կորոնավիրուսն ու արտակարգ դրությունը նոր մարտահրավերների հետ մեկտեղ մեր առաջ բացեց նաև նոր հնարավորություններ: Մարդիկ աշխատում, սովորում և «ապրում են» օնլայն: Գրեթե ամեն ինչի վիրտուալացումը մեր առաջ բացեց բավականին շատ օնլայն նախաձեռնություններ, որոնց շնորհիվ կարող ենք սովորել նոր հմտություններ, նոր գիտելիքներ՝ անգամ առանց որևէ վճարի: Այդպիսի նախաձեռնություններից մեկին էլ անդրադարձել է YerevanStyle.com-ը՝ զրուցելով անվճար գրաֆիկ դիզայնի դասընթացների մի խմբի հիմնադիր-կազմակերպչի հետ:

Խումբը, որ ունի շուրջ 1000 անդամ, անվճար հիմունքներով իրականացնում է գրաֆիկ դիզայնի դասընթացներ, սովորեցնում, առաջադրանքներ տալիս և ստուգում: «Learn Graphic design with Artoutik» խմբի հիմնադիր Գրիգորյան Ն.-ն նշում է, որ այն մարդկանց համար, ովքեր աշխատասիրություն և ձգտում ունեն, նմանօրինակ նախաձեռնությունները պիտի հասանելի լինեն և հնարավորություն տալ ինքնազարգանալ և կրթվել:

–Նախ սկսենք նրանից, թե ի՞նչը պատճառ հանդիսացավ այդպիսի պատասխանատու գործ սկսելու համար, ի՞նչ սպասելիքներ կարող են ունենալ ձեր հետևորդները Ձեզանից..

-Ընդհանրապես, գրաֆիկ դիզայներ դառնալ կամ, առհասարակ, դիզայների մասնագիտություն ձեռք բերելը մեծ աշխատասիրություն է պահանջում: Սեփական փորձից կարող ենք ասել, որ միշտ էլ աճելու, առաջ գնալու, հմտությունները զարգացնելու կարիք կա, իսկ նմանատիպ դասընթացները և սեմինարները սովորաբար բավականին թանկ արժեն: Պատճառներից մեկը դա էր՝ միասին սովորել, կրթվել, իրար օգնելով առաջ գնալ: Մեկ ուրիշ պատճառ՝ հասանելի, հասկանալի դարձնել մասնագիտությունն այն մարդկանց համար, ովքեր մեծ աշխատասիրություն և ձգտում ունեն։ Հավատացեք, ամեն բան հնարավոր է, եթե ձգտում ունեք, իսկ մենք ընդամենը փորձում ենք ուղորդել։ Դիզայնի մասին միշտ կարելի է խոսել, խմբում բոլորն էլ, դիզայներ լինելով, կարող են կիսվել իրենց խորհուրդներով, միմյանց օգնել, ոգևորել և նաև այդ կերպ լցնել իրենց ժամանակը՝ նոր մասնագիտություն ձեռք բերելու կամ ունեցած հմտություններն ավելի զարգացնելու համար:

–Գրաֆիկ դիզայներ դառնում են, թե՞ ծնվում: Չէ՞ որ պետք է ունենալ ստեղծարար միտք:

-Երկուսն էլ: Այսօր մենք կարող ենք մարզվել, զարգացնել մեր միտքը: Կան բազմաթիվ կայքեր, որոնք հասանելի են, որտեղից կարող ես ոգեշնչվել, նույնիսկ վատ ստեղծած աշխատանքից հետ կատերել մեկ այլ՝ յուրօրինակ աշխատանք:

–Որքանո՞վ է այսօր ակտուալ այս մասնագիտությունը: Կա՞ պահանջարկ արտասահմանյան և հայկական շուկայում:

-Այո՛, մասնագիտությունը մեծ պանաջարկ ունի, ամեն ինչ, կարելի է ասել, կապված է դիզայնի հետ՝ մարկետինգ, վաճառքներ, փաթեթավորում, վեբ կայքեր, պահանջարկը շատ մեծ է: Այն իր պահանջարկով համարվում է ծրագրավորումից հետո 2-րդ մասնագիտությունը ֆրիլանս շուկայում։

-Ինչքա՞ն ժամանակում կարելի է հասնել արդյունքի:

-Արդյունքի հասնելը կախված է մարդու ընդունակություններից: 2-3 ամսում կարելի է ձեռք բերել սկզբնական գիտելիքներ, բայց երկարատև կուրսերն ավելի արդյունավետ են, նվազագույնը՝ շուրջ 1տարի։

–Ի՞նչ խորհուրդ կտաք սկսնակներին:

-Սովորել, շատ աշխատել, շատ փորձել, երբ չի ստացվում, ուղղակի չհուսահատվել, շարունակել ստեղծագործել, և հիշել՝ սկզբից միշտ էլ դժվար է։