Չինական Bytedance ընկերությունը, որին պատկանում է TikTok հավելվածը, օգոստոսի 24-ին դատական հայց է ներկայացրել ԱՄՆ նախագահի վարչակազմի դեմ՝ փորձելով վիճարկել իշխանությունների՝ Միացյալ Նահանգների տարածքում ընկերության աշխատանքն արգելելու մտադրությունը: Այս մասին հայտնում է РИА Новости-ն՝ վկայակոչելով ընկերության հայտարարությունը:
«Մեր բողոքում բացատրել ենք, որ կարծում ենք, որ վարչակազմը անտեսել է իր մտահոգություններին արձագանքելուն ուղղված մեր զգալի ջանքերը, որ ձեռնարկել ենք բարեխղճորեն և լիամասշտաբ, անգամ երբ համաձայն չենք եղել այդ մտահոգությունների հետ»,- ասվում է ընկերության հայտարարության մեջ:
Հայտարարության մեջ նշվում է, որ TikTok հավելվածից օգտվում են 100 մլն ամերիկացիներ, ԱՄՆ-ում ընկերությունն ունի 1500 աշխատատեղ, ևս 10000 աշխատատեղ նախատեսվում է ստեղծել մի քանի նահանգներում:
Ավելի վաղ ԱՄՆ նախագահ Դոնալդ Թրամփը հայտարարել էր, որ մտադիր է երկրի տարածքում արգելել հավելվածի գործունեությունը՝ ելնելով ազգային անվտանգության նկատառումներից:
Discussion about this post