Էկվադորցի զույգը, որը դիմակայել է ժամանակի փորձությանը և միասին է ապրում ութ տասնամյակ, որպես աշխարհի ամենատարեց ամուսնական զույգ հայտնվել է Գինեսի ռեկորդների գրքում, գրում է Daily Mail-ը։
110-ամյա Խուլիո Սեզար Մորան և 104-ամյա Վալդրամինա Քինտերոն ծանոթացել են 1934-ին և ի հեճուկս իրենց ծնողների դիմադրության՝ ամուսնացել 1941-ի փետրվարի 7-ին, նրանք իրենց երկարատև հարաբերությունները վերագրում են սիրուն և հարգանքին, որը միմյանց հանդեպ չեն դադարել տածել այս տարիների ընթացքում։
«Սիրո, փոխադարձ հարգանքի, ազնիվ աշխատանքի և ճիշտ դաստիարակության հիման վրա ստեղծված ընտանիքը առողջ համակեցության բանալին է», -ասում են ամուսինները, որոնք 5 երեխա, 11 թոռ և 9 ծոռ ունեն։
Ինչպես և ցանկացած ամուսնական զույգ, նրանց կյանքը նույնպես անմասն չի եղել տարաձայնություններից, սակայն նրանք փորձել են միասին հաղթահարել դրանք։
«Մեր հարաբերություններում հարգանքը, կարեկցանքն ու հոգատարությունը մեծ նշանակություն են ունեցել, մենք երբեք չենք վիճել։ Եղել են տարաձայնություններ, բայց դրանք նկատելի չեն եղել մեր երեխաներից ոչ մեկին, որոնք նույնպես արժանի են հարգանքի և սիրո»,- հայտնել է զույգը։
Discussion about this post