Իտալիայի հյուսիսում գտնվող Ֆելտրե քաղաքում Լուիջի անունով 10-ամյա պինչեր ցեղատեսակի շունը համավարակի ժամանակ իր ընտանիքին ցուցաբերած օգնության համար արժանացել է «Շան հավատարմություն 2020» մրցանակին, «ՌԻԱ Նովոստիին» հայտնել է միջազգային պարգևի շնորհման կոմիտեի ղեկավար Սոնյա Ջենտոզոն։
«Ամեն տարի մենք մրցանակ ենք շնորհում այն շներին, որոնք մարդկանց մեծ օգնություն են ցուցաբերում՝ փաստելով, որ շներն իսկապես մարդու ամենամտերիմ ու հավատարիմ ընկերներն են»,- ասել է նա՝ ընդգծելով, որ «Շան հավատարմություն» պատվավոր կոչումն այս տարի միաձայն շնորհվել է Լուիջիին։
«Այս գեղեցիկ շունը լավագույնս համապատասխանում է մեր մրցանակի գաղափարին։ Երկարատև ինքնամեկուսացման ծանր շաբաթներին շատ չորքոտանի ընկերներ դարձել են իրենց տերերի համար ուրախության և հույսի գրեթե միակ աղբյուրը»,- նշել է Ջենտոզոն՝ մանրամասնելով, որ համավարակի օրերին, երբ շան տիրուհի Մարիա Բուցզատը և վերջինիս մայրը ամիսներ շարունակ ինքնամեկուսացման մեջ են եղել, Լուիջին նրանց միակ կապող օղակն է եղել և նրանց նամակագրական կապի մեջ պահել։
Discussion about this post