Մեր կողքին ապրող մարդիկ. Inside. Ստեղծարար թիմ ու հետաքրքիր գործունեություն

Այս անգամ YerevanStyle.com–ի զրուցակիցն է` Սվետա Նասիբյանը, ում հետ կապ հաստատեցինք առցանց եղանակով: Նա ևս կիսվեց մեզ հետ հաջողության իր սեփական բանաձևով:

Իմ մասին.

Ծնվել և մեծացել եմ Տավուշի մարզի Կողբ գյուղում: Առաջին մասնագիտությամբ սոցիալական աշխատող եմ, այժմ սովորում եմ ՀՀ պետական կառավարման ակադեմիայի պետական կառավարում և տեղական ինքնակառավարում բաժնում: Այնպես է ստացվել, որ աշխատանքային գործունեությունս ծավալում եմ Երևանում: Տարբեր ոլորտների նկատմամբ հետքրքրասիրությունը կամ էլ իմ իրական մասնագիտությունը գտնելու փնտրտուքները տարան նրան, որ ես մի քանի մասնագիտություններ ձեռք բերեցի: Բայց չեմ ափսոսում, ես բոլորին էլ շատ եմ սիրում: Այս կյանքում ոչնչի համար երբեք պետք չէ ափսոսալ:

Համալսարանից համալսարան, մի աշխատանքից մյուս աշխատանք. այս ամենը բերեց  մի կետի.

Հնարավոր չէր այպես շարունակել ու արդեն ժամանակն է սեփական գաղափարները կյանքի կոչելու: Իսկ քանի որ գործում են  միայնակ հաջողության չեն հասնում, ինձ անհարժեշտ էր ունենալ լավ, հզոր թիմ, որի հետ կկարողանայի անել անհնարինը:  Այսպես, իմ ծրագրերի մասին պատմեցի ընկերներիս, և միասին ստեղծեցինք Inside-ը:

Ինչը վերաբերվում է թիմին, ապա Inside- ում են աշխատում փորձառու, կրեատիվ, աշխատասեր, միշտ նոր գաղափարներով մասնագետներ՝ Հասմիկը, Անին, Ալվարդը: Մեզ իսկապես հաճելի է աշխատել իրար հետ: Մենք լրացնում ենք մեկս մյուսին:

Մեր թիմը դեռ փոքր է, բայց դա չի խանգարում լավ, որակյալ աշխատանքին:

Անվան ընտրությունը.

Inside թարգմանաբար նշանակում է ներսում: Բոլորն էլ իրենց ներսում ունեն չէ՞ գաղափարներ, նպատակներ, որ չգիտեն ինչպես իրացնել: Մենք ներթափանցում ենք մարդկանց ներաշխարհ և օգնում գտնել լուծումները:

Inside-ի գործունեության ոլորտները.

Մենք համագործակցում ենք տարբեր կազմակերպությունների և անհատների հետ: Առաջին ուղղությունը SMM-ն է (social media marketing): Համագործակցելով տարբեր կազմակերպությունների և անհատների հետ՝ մենք սոցիալական հարթակների միջոցով իրենց բիզնեսը կամ կատարած աշխատանքները դարձնում ենք ճանաչելի, որը նպաստում է հետագայում կայուն դիրք ապահովել տվյալ ոլորտի շուկայում: Հաջորդ ուղղությունը անվանել ենք ֆոտոներկայացում: Մենք ստեղծում ենք Ձեր խառնվածին, բնավորությանը համապատասխան բեմ, իսկ դուք ստանում եք չկրկնվող, արտասովոր, յուրօրինակ նկարներ:

Գործունության ընթացքում հանդիպած դժվարությունների և հաջողությունների մասին.

Ցանկացած գործունեություն անհնար է պատկերացնել առանց դժվարությունների, բայց Inside-ում առաջնորդվում ենք հետևյալ գաղափարով չհուսահատվել ու առաջ շարժվել, իսկ հաջողությունները ընթացքում կգան:

Կյանքում հանդիպող դժվարություններն ընդունում եք որպես.

Նոր հնարավորություն, պետք է մի կողմ դնել բոլոր մտավախությունները և գործել: Ինչքան երկար մտածեք, այքան շատ կխճճվեք ու արդյունքում կկորցնեք բոլոր նպատակները: Գործե՛ք:

Իմ ոգեշնչման աղբյուրը.

Ոգեշնչման աղբյուր են եղել ու կան իմ կյանքի որոշ փուլերում հանդիպած մարդիկ, որոշ իրադարձություններ, որ ստիպել են այլ կերպ նայել ամեն ինչին:

Կյանքը հենց մի ամբողջ ոգեշնչման աղբյուր է:

«Հաջողության Ձեր բանաձևը».

Լինել լավատես, մտածել միայն դրականը:

Ապագա պլաններ.

Նպատակներ և պլանները այնքան շատ են, բայց առաջնային և մոտակա պլանները կապված են Inside-ի հետ: Հետևեք Inside –ի գործունեությանը: Անակնկալներն առջևում են:

Զրուցեց ՝  Սյուզաննա Աղաբաբյանը