Գիտեմ

Գիտեմ՝ կգաս առավոտյան
Կամ կեսօրին, երբ կարոտը
Մի հասարակ բառ չի լինի,

Այլ կլինի անօդում օդ,
Միմյանց ձգտող մարմինների
Հանդիպման վայր:

Գիտեմ՝ կգաս գաղտագողի,
Այնպես կգաս, որ ստվերդ
Եկած ճամփեդ կմոռանա ու չի հիշի:

Շուրթդ շողով, կուրծքդ լույսով
Օծած՝ կգաս, երբ դարը՝ կարճ,
Իսկ վայրկյանը հավերժ լինի:

Ու դու նորից
Դանդաղ քայլես ու չիմանաս,
Թե ոտքերդ ո՞ւր են տանում:

Գիտեմ՝ կգաս, անմերկ
Ու մերկ կգաս, հույսով մի պարզ,
Որ հավերժում հանդիպելիս
Չեն բաժանվում սիրող մարդիկ:

Գարմար