Փիլիսոփայություն

Դու՞ք էլ եք այսպես մտածում՝ «թքա՛ծ, թե մարդիկ ինչ կասեն իմ մասին»

կարծիք
Լսել, թէ՛ չլսել մարդկանց կարծիքը

Լսե՞լ, թե՞ չլսել մարդկանց

Իմաստուն ուսուցչին մի անգամ մոտենում են իր աշակերտները և հարցնում.

-Ուսուցի՛չ, ի՞նչ խորհուրդ կտաք, արդյո՞ք կարելի է լսել բոլոր մարդկանց կարծիքը, թե ին՞չ են նրանք ասում մեր մասին, թե՞ անենք այն, ինչը մեզ է հարմար:

Ուսուցիչը, մի պահ լռելով, պատասխանում է:

-Երբեք մի՛ անարգեք մարդկանց կարծիքը: Մենք ունենք երկու աչքեր, իսկ մեզ շրջապատող մարդիկ բազում աչքեր, հետևաբար՝ նրանք ավելի շատ բան կարող են նկատել:

Կան բաներ մարդու կյանքում, որ իր աչքերը չեն կարող տեսնել, իսկ մարդկանց աչքերը նկատում են այն, ինչը մենք չենք նկատում:

Մեզ շրջապատող մարդիկ նման են հայելուն. հայելին կարողանում է ցույց տալ միայն այն, ինչ այնտեղ երևում է:
Ճիշտ այդպես էլ մեզ շրջապատող մարդիկ՝ նրանք մեր հայելիներն են: Հետևաբար՝ նրանք խոսում են այն, ինչ տեսնում են: Երբ նայում ենք հայելուն և այնտեղ տեսնում թերություններ, մենք հայելու վրա չենք բարկանում, այլ ուղղում նկատված թերությունները:

Ճիշտ այդպես էլ պետք է վերաբերվենք մեզ խրատող մարդկանց հետ, շատ անգամ նրանք կարողանում են տեսնել այն, ինչը մենք չենք կարող: Այդ մարդիկ կատարում են նույն հայելու դերը: Նրանց վրա պետք չէ բարկանալ, այլ պետք է ուղղել մեր կողմից կատարված սխալները:

Կյանքի օրենքն է այդպես. դու գործում ես, իսկ մարդիկ՝ գնահատում: Եթե ցանկանում եք լավ գնահատվել, ապա լա՛վը գործեք:

Ասելով՝ ես լավն եմ, դեռ քիչ է: Ճշմարտությունը հաստատելու համար ևս երեք վկա է պետք: Եթե այս կյանքում գոնե երեք հոգի մի մարդու մասին նույն կարծիքին լինի, նշանակում է՝ այդ մարդը արդեն սկսում է լավը լինել:

– Իսկ լսե՞լ բոլորին. չէ՞ որ մարդիկ ոչ միշտ են ճշմարտությունը խոսում, – հարցրին աշակերտները:

-Պետք է բոլորին լսել, քանի որ բոլորն ել կարողանում են խոսել: Բայց, որ մարդը միայն ճիշտը չի խոսում, դա ճիշտ եք նկատել: Նույն բերանը խոսում է սուտը, նախանձը, կեղծիքը, բարին, չարը ու նման շատ բաներ: Ձեզ պետք է նախ ճանաչել ստին, նախանձին, կեղծիքին, չարին ու բարուն:

Ճանաչելով այդ ամենը՝ կճանաչեք նաև մարդկանց և կիմանաք նաև ճշմարտությունը:

-Իսկ ինչպե՞ս ճանաչենք,- հացրեցին աշակերտները:

Պատասխանելով՝ ուսուցիչն ասաց.

-Բարին խոսում է ճշմարտությունը, նախանձը լռում է, սուտը փնովում է, կեղծը շողոքորթում է, իսկ չարը բամբասում և վարկաբեկում է:

Ո՛վ  մարդ, ի՞նչ ես ցանկանում, որ մարդիկ խոսեն քո մասին, դա էլ արա: Մարկոս Տուլիոս Ցիցերոն

Դե հեռու մայլեն գնա, թափառի՛ր և, այս աշխարհի դեմքին նայելով՝ չարին չար ցույց տուր, բարուն՝ բարի, պարզ ու անխարդախ աչք հայելի:

Ձեզ եմ ներկայացնում հայկական մուլտֆիլմ՝ Հովհաննես Թումանյանի համանուն հեքիաթի հիման վրա:

 

Հեղինակի մասին

Մարգարիտ Խաչատրյան

Մարգարիտ Խաչատրյան

Ավարտել է Նիկոլաևի համալսարանի (Ուկրաինա) փիլիսոփայության բաժինը: Էթիկետի մասնագետ է, աշխատում է նորմատիվային էթիկայի բնագավառում՝ համագործակցելով սպասարկման ոլորտի կառույցների հետ: Ուսումնասիրում է հոգեբանություն և մարդաբանություն: Սիրում է միշտ մի նոր բան սովորել և շփվել մարդկանց հետ:

Մեկնաբանել գրառումը

Ավելացնել մեկնաբանություն